Денеска и утре, АД МЕПСО е домаќин на стратегискиот семинар и 109-от состанок на Комитетот за развој на европските електроенергетски системи, кои се одржуваат под покровителство на ENTSO-e ( Европската асоцијација на оператори на преносни системи за електрична енергија). Овие два дена Скопје е центарот на стратешки дијалози за иднината на електроенергетските мрежи, иновациите и планирање на инфраструктурата, место каде водечките европски енергетски експерти ги дефинираат идните насоки на развој на електроенергетската мрежа.
Овие настани се одржуваат во клучен момент за енергетската транзиција на Европа – во време на ревизија на TEN-E регулативата и развојот на т.н. „Grids Package“. Во фокусот на техничките и стратешки дискусии на високо ниво се и напредокот на TYNDP 2026, анализи поврзани со сигурноста на снабдување (ERAA) и идентификација на системски потреби и нови инвестиции.
Целта е заедничка, унапредување на европската енергетска визија преку размена на знаења, координација на политики и синхронизирано планирање во насока на поодржлив, пофлексибилен и поинтегриран електроенергетски систем.
Собрани сме овде не само како професионалци од цела Европа, туку и како посветени партнери во обликувањето на иднината на енергетската инфраструктура. Во еден сè посложен и меѓусебно поврзан електроенергетски систем, важноста на координираното планирање на европската мрежа не може да се прецени. Транзицијата кон одржлив, сигурен и флексибилен енергетски систем бара заедничка визија - и, што е поважно, заедничко дејствување. Начинот на кој ги планираме нашите преносни мрежи денес, ќе одреди колку ефикасно ќе се справиме со утрешните предизвици, рече на отворањето на состанокот, генералниот директор на АД МЕПСО, Бурим Љатифи.
Комитетот за развој на системот (SDC) има клучна улога во усогласување на националните и регионалните планови за пренос на енергија во кохерентна, паневропска визија – со цел создавање паметна, флексибилна мрежа подготвена за идни предизвици и масовна интеграција на обновлива енергија