ShA  MEPSO ka shpallur një tender të ri ndërkombëtar për ndërtimin e interkoneksionit 400 kV midis Maqedonisë së Veriut dhe Republikës së Shqipërisë, një projekt me rëndësi kyçe për integrimin rajonal dhe stabilitetin energjetik të vendit tonë. Bëhet fjalë për një tender me të cilin ShA  MEPSO, së bashku me partnerin strategjik BERZH-in, vendos një model të ri të procedurave transparente dhe profesionale, një prokurim publik i bazuar në kriteret më të larta për performancën teknike, cilësinë dhe aftësinë financiare.

 “Më vjen keq që për më shumë se tre dekada, pavarësisht pluralizmit politik dhe ndryshimeve demokratike, nuk ka pasur guxim dhe vizion institucional për të krijuar një lidhje elektroenergjetike me Shqipërinë. Sot, ne po korrigjojmë këtë mungesë historike. Puna jonë udhëhiqet nga një vizion për zhvillim të qëndrueshëm, stabilitet institucional dhe përforcim të  besimit të publikut në kapacitetin e shtetit për të zbatuar projekte me interes më të lartë nacional. Jam i bindur se të gjithë së bashku, me një vizion dhe përkushtim të përbashkët, do të ndërtojmë një sistem elektroenergjetik modern, efikas dhe të qëndrueshëm, që do t’Ju shërbejë gjeneratave të ardhshme” deklaroi në konferencën  për shtyp në Qeveri, drejtori general i ShA  MEPSO,  z.Burim Latifi.

 Duke treguar vendosmëri dhe integritet, kjo udhëheqësi e  ShA  MEPSO,  potencoi ai, ka anuluar kontratën me kontraktorin e mëparshëm, Energoprojekt nga Bosnja dhe Hercegovina, për shkak të një sërë shkeljesh të konstatuara.

 U ballafaquam me një projekt seriozisht të lënë pas dore: nga 269 themele të planifikuara për shtyllat e linjës së transmetimit, ishin përfunduar vetëm 24, gjë që tregon qartë nëse ka pasur seriozitet për përfundimin e projektit. Në kundërshtim me kontratën sipas FIDIC, kontraktori, përmes kërkesave të pajustifikuara për mjete  shtesë dhe braktisjes së njëanshme të terrenit, ka rrezikuar projektin dhe interesin publik. Sa u përket mjeteve financiare, tashmë janë paguar 5.8 milionë euro për kontraktorin e mëparshëm, nga të cilat rreth 2 milionë euro janë kthyer përmes garancive bankare. A do të thotë kjo se anulimi i kontratës ka pasoja financiare? Jo, mjetet janë dhënë për prokurim  të  pajisjeve që janë pronë e jona,” shtoi z. Latifi.

 Projekti parashikon ndërtimin e rreth njëqind kilometrave largpërçues me linjë mbitokësore nga trafostacioni  Manastir 2 deri në kufirin Maqedoni-Shqipëri. Vlera e parashikuar e projektit është rreth 17 milionë euro, e financuar përmes kredisë dhe granteve nga BERZH-i dhe fondet evropiane. Afati për dorëzimin e ofertave është 45 ditë, ndërsa zgjedhja e ofertuesit më të favorshëm pritet në tremujorin e tretë të këtij viti, me fillimin e zbatimit në fillim të vitit 2026 dhe përfundimin deri në fund të vitit 2027.

 Ndërtimi i linjës 400 kV përfaqëson më shumë  se sa ndërtim të një  infrastrukture  energjetike; është një hap themelor drejt përfundimit të korridorit rajonal energjetik Lindje-Perëndim, i cili lidh Bullgarinë, Maqedoninë e Veriut, Shqipërinë, Malin e Zi dhe Italinë përmes një kablli nënujor. Ndërtimi i këtij interkoneksioni do ta pozicionojë sistemin tonë si një pjesë thelbësore e infrastrukturës elektroenergjetike evropiane, duke mundësuar pjesëmarrje stabile  në tregjet rajonale, qasje në shërbime sistemike dhe balancuese, si dhe sigurimin e një furnizimi më të sigurt dhe më ekonomik për të gjithë qytetarët. Në këtë mënyrë, Maqedonia e Veriut konfirmon edhe një herë ambicien e saj strategjike: të bëhet nyje energjetike në Ballkan.

ShA  MEPSO me  dhimbje të thellë  i jep lamtumirën e fundit kolegut të çmuar Zoran Ilioski.

Ilioski ka qenë pjesë e kolektivit tonë që nga viti 2019, fillimisht si drejtues i departamentit të linjave të transmetimit, dhe më pas, për një periudhë, si drejtor i Njësisë së rrjetit të transmetimit  ORrT dhe anëtar i Këshillit Drejtues të ShA  MEPSO.

Si një  elektroinxhinier  i shquar, Ilioski dha një kontribut të rëndësishëm në realizimin e shumë projekteve për ndërtimin dhe modernizimin e linjave të transmetimit dhe trafostacioneve.  Profesionalizmi dhe përkushtimi i tij  përball sfidave  për  sigurim të  stabilitetit të  rrjetit të transmetimit ishin të një rëndësie të veçantë për kompaninë tonë.

Zoran Ilioski la një shembull të një punonjësi jashtëzakonisht të përkushtuar, me njohuri dhe përvojë të lartë, dhe një njeri, kontributi i të cilit  u vlerësua në të gjithë sektorin energjetik  të  Maqedonisë.

U prehtë në paqe!

ShA MEPSO është një nga faktorët kryesor,  i cili  në të ardhmen  do të përqendrohet  në    tejkalimin e problemeve të akumuluara pronësore- juridike nga të cilat varet ecuria e projekteve kapitale në rrjetin elektrotransmetues. Ky proces i bashkëpunimit ndërinstitucional do të përfshijë Ministrinë e Energjetikës, Ministrinë e Transportit dhe Lidhjeve, Agjencinë e kadastrës së pasurive të patundshme dhe Administratën e çështjeve pronësore- juridike.

Në takimin që u zhvillua në Ministrinë e Energjetikës, drejtori i ShA  MEPSO Burim Latifi,  theksoi se për shkak të procedurave të gjata dhe komplekse administrative për gjetjen e zgjidhjeve për çështje pronësore-juridike dhe regjistrimin e pronës shtetërore në Agjencinë kadastrale, janë ngecur disa projekte të rëndësishme infrastrukturore, duke përfshirë ndërtimin e një trafostacioni të ri pranë fshatit Miletkovë, që është pjesë e rëndësishme e strategjisë për modernizimin e rrjetit transmetues.

“Gjatë realizimit të projekteve të tilla strategjike, përballemi me vështirësi serioze, para së gjithash, për shkak të problemeve pronësore- juridike, të cilat ndikojnë drejtpërdrejt në dinamikën e zbatimit. Duke pasur parasysh  rëndësinë e projekteve të tilla për stabilitetin energjetik dhe integrimin e tregut energjetik maqedonas  në tregjet rajonale dhe evropiane të energjisë elektrike, është më se i nevojshëm  koordinimi ndërinstitucional i përforcuar dhe  në kohë, si  dhe definimi i procedurave që do të përshpejtojnë veprimet për zbatimin e projektit pa prolongim dhe implikime financiare  shtesë”,  deklaroi Latifi.

Një vendosmëri e tillë e institucioneve për t'u përballur me sfidat e këtij lloji, sipas Latifit, sigurisht që do të çojë në qëllimin e dëshiruar, realizimin e përshpejtuar të projekteve energjetike që janë vendimtare për transmetim  stabil  dhe të besueshëm të energjisë elektrike.