Drejtori gjeneral i ShA MEPSO z. Orhan Murtezani dhe Ministri i Punëve të Jashtme z. Bujar Osmani, zhvilluan një takim pune me një delegacion të lartë nga Republika e Bullgarisë të kryesuar nga kryeministri Kiril Petkov. Në takimin e mbajtur në TS Manastir 2, mysafirët u njohën me dinamikën dhe përfitimet e ndërtimit të 400 kV largpërçues në kuadër të Korridorit 8 paneuropian me të cilin Republika e Maqedonisë së Veriut do të lidhet energjetikisht me Republikën e Shqipërisë.
Ndërtimi i këtij projekti kapital është hallka e fundit në realizimin e korridorit energjetik lindje-perëndim, me ç’rast rajoni përfiton një lidhje të re energjetike përmes së cilës, siç tha drejtori Murtezani, energjia elektrike e prodhuar në Bullgari dhe Maqedoninë e Veriut do të mund të eksportohet në Shqipëri dhe Itali në rrugë transmetimi të reduktuara në mënyrë drastike dhe me kosto më të ulët se më parë.
Një lidhje më e mirë është një fazë kalimtare drejt një të ardhme më të mirë të përbashkët. Investime të tilla janë prioritet strategjik i të gjitha qeverive, sepse ofrojnë një ndërlidhje më të madhe midis vendeve përgjatë Korridorit 8, midis anëtarëve aktualë dhe të ardhshëm të BE-së dhe hapin mundësi më të mëdha për ekonomitë e të tre vendeve. Maqedonia e Veriut është qendra kryesore transitore e Korridorit 8 për lidhje të Detit Adriatik dhe Detit të Zi. Me projekte të tilla kapitale, jo vetëm që marrim pjesë në zhvillimin e tregut rajonal të energjisë elektrike dhe rritje të kapacitetit të burimeve të ripërtëritshme të energjisë, por stimulojmë më shumë investime, thellojmë marrëdhëniet e fqinjësisë me Bullgarinë dhe Shqipërinë dhe vërtetojmë synimet dhe intereset e përbashkëta për zhvillim dhe integrimin të rajonit, potencoi drejtori Murtezani në takimin e sotëm.
Gurthemeli i 400 kV largpërçues Manastir-Elbasan u vendos gati dy muaj më parë dhe tani, në kushte të stabilizuara atmosferike, aktivitetet ndërtimore vazhdojnë me ritme të pandërprera. Largpërçuesi i ri është 97 km i gjatë dhe do të instalohet në 260 shufra çeliku. Investimi është në vlerë prej 17.22 milionë euro hua nga BERZH dhe grant nga WBIF.