Економскиот советник од Амбасадата на САД во С.Македонија, Барнабас Биркеланд заедно со генералниот директор на АД МЕПСО, доц.др. Бурим Љатифи, беа во работна посета на градилиштето на новата 400/110 kV трансформаторска станица Охрид (ТС Охрид).
Посетата е дел од заложбите за следење на напредокот на првата директна 400 kV интерконекција меѓу Северна Македонија и Албанија, што претставува значаен чекор за развој и унапредување на регионалната соработка, поврзување на пазарите, зголемена стабилност на мрежата и сигурно и безбедно снабдување со електрична енерија.
Проектот влезе во значително интензивирана фаза на реализација, со зголемен обем на градежни активности што се изведуваат на терен од 80.000 м². Во тек се монтажни работи во 400 kV постројка, изградба на командната зграда, магацин и објекти за влезно-излезни водови.
Во наредниот период, динамиката на реализација ќе треба да се усогласи со почетокот на работите на 400 kV далекувод Битола – албанска граница, кој претставува втората компонента на интерконекцијата.
Со изградба на ТС Охрид, Северна Македонија го зајакнува своето место во регионалниот електроенергетски систем, обезбедувајќи поголема стабилност, сигурност и услови за приклучување на нови производствени капацитети од обновливи извори. Трафостаницата ќе овозможи 400 kV приклучок и три излези на 110 kV кон Охрид, Струга и Ресен – што ја прави клучен елемент за напојување на домажинствата и стопанството во западниот дел од земјата.